Mundi hiklaust veðja á Gunnar Nelson

Gunnar Nelson kemur til með að keppa sinn annan atvinnumannabardaga í UFC deildinni þann 16. febrúar næstkomandi. Þá mætir hann Brasilíumanninum Jorge „Sandman" Santiago í Wembley Arena í London. Athygli vekur að veðmálasérfræðingar í MMA bardögum hjá Betsson telja meiri líkur á að Gunnar fari með sigur af hólmi þrátt fyrir að andstæðingur hans sé reynslumeiri og töluvert stærri en hann sjálfur.

Stuðullinn sem Betson setur á Gunnar er 1,57 en á Santiago er settur stuðullinn 2,25, sem þýðir að Gunnar er talinn sigurstranglegri. Að sögn Halldórs Halldórssonar, sérfræðings í MMA bardögum, kemur þetta ekki á óvart.

„Gunni er á mjög hraðri uppleið og er töluvert meira en bara efnilegur, hann er einn af bestu mönnum í heimi í gólfglímu. Mér finnst fólk þó eiga til að gleyma því að allt getur gerst í svona bardaga. Það geta allir tapað," segir Halldór sem hefur mestar áhyggjur af þyngarmuninum milli Gunnars og Santiago, en sá síðarnefndi er töluvert stærri og þyngri.

Inntur eftir því hvort hann mundi sjálfur veðja á Gunnar í umræddum bardaga svarar hann játandi. „Ég mundi hiklaust veðja á Gunnar. Hérna megin í Vesturbænum hef ég fulla trú á því að Gunnar Nelson sé næsti heimsmeistari í MMA."