Charlie Sheen sendi kveðju úr Bláa lóninu

Stórleikarinn Charlie Sheen birti í dag mynd af sér á samskiptamiðlinum Twitter þar sem hann er staddur með félaga sínum í Bláa lóninu. Hann er staddur hér á landi með félögum sínum í páskafríi. Fyrst fréttist af honum í gær þegar útvarpskonan Ósk Gunnarsdóttir sá hann í miðbænum.

„Ég sá hann með mínum eigin augum," sagði Ósk í samtali við Vísi í gær. „Hann var þarna fyrir utan hótelið með tveimur risastórum lífvörðum og einni af kærustum sínum, þarna klámmyndaleikkonunni. Það var hálfgert kaos þarna fyrir utan hótelið og einhverjum gestum meinaður aðgangur, en ég strunsaði bara þarna inn," bætti hún við.

Charlie Sheen er bróðir leikarans Emilio Estevez og sonur Martins Sheen. Hann hefur átt velgengni að fagna á kvikmyndaferlinum, en undanfarin ár hefur hann verið þekktastur fyrir sukklíferni sitt.

Í færslunni á Twitter sendir Sheen fylgjendum sínum óskir um gleðilega páska.