Bókinni hefur verið líkt við Einar Áskel

„Við erum báðar hugmyndaríkar og skapandi mæður og það hefur lengi verið draumur okkar beggja að gefa út barnabók,“ segir Elsa Nielsen, grafískur hönnuður, sem gaf nýverið út ævintýrabókina Brosbókina í samstarfi við vinkonu sína Jónu Valborgu Árnadóttur.



„Jóna Valborg, sem stundar meistaranám í mannauðsstjórnun, bar hugmyndina undir mig og ég var ekki lengi að segja já.“

Þær stöllur sameina hér krafta sína í þessari nýstárlegu bók sem hefur verið líkt við barnabækurnar um Einar Áskel. Brosbókin er fyrsta höfundaverk þeirra og segir Elsa að það hafi verið frábært að vinna svona náið með vinkonu sinni.

Jóna er höfundur texta en Elsa á heiðurinn af hönnun og myndskreytingum. Sagan er með ævintýralegum blæ og kemur sífellt á óvart.



„Ég vildi fara sömu leið með teikningarnar. Myndirnar eru frekar grófar en á sama tíma fallegar og ég leyfði ímyndunaraflinu að leika lausum hala,“ segir Elsa. „Bókin er ekki síður skrifuð fyrir fullorðna en börn. Aðalpersóna bókarinnar, Sóla, er alltaf í góðu skapi og hefur þannig jákvæð áhrif á aðra.

Einn daginn vaknar hún broslaus og úrill. Foreldrarnir rjúka til og vilja gera allt til að stelpan þeirra verði glöð á ný. Brosbókin er vel til þess fallin að ræða við börnin um tilfinningar, sínar eigin og annarra,“ segir Elsa að lokum glöð í bragði.

Á menningarnótt 24. ágúst verður útgáfuveisla þar sem þær bjóða öllum að koma og fagna með sér útgáfu bókarinnar. Veislan verður í Borgarbókarsafninu Tryggvagötu frá kl 13.00-15.00