Árni Þór með flottan leik í þýska bikarnum

Árni Þór Sigtryggsson skoraði átta mörk og var markahæstur þegar EHV Aue komst áfram í þýska bikarnum í handbolta í kvöld. Íslendingaliðin TV Emsdetten, GWD Minden og Bergischer HC komust líka áfram í bikarnum í kvöld.

Árni Þór skoraði eins og áður sagði átta mörk fyrir EHV Aue þegar liðið vann 35-31 útisigur á SV 64 Zweibrücken en Sveinbjörn Pétursson var í marki Aue.

Ólafur Bjarki Ragnarsson skoraði fjögur mörk og Ernir Hrafn Arnarson var með eitt mark þegar TV Emsdetten sló út HSG Krefeld með 32-23 sigri á útivelli.

Vignir Svarsson skoraði eitt mark í 28-22 sigri TSV GWD Minden á b-liði félagsins TSV GWD Minden II.

ThSV Eisenach tapaði 29-32 á útivelli á móti SG Wallau. Bjarki Már Elísson skoraði fimm mörk fyrir Eisenach og Hannes Jón Jónsson var með fjögur mörk.

Bergischer HC vann öruggan 36-20 sigur á SG Achim/Baden en landsliðsmennirnir Björgvin Páll Gústavsson og Arnór Þór Gunnarsson spila með Bergischer.