Þjálfar þátttakendur í Next Top Model

„Ég á að þjálfa stelpurnar hérna í miðborg Kaupmannahafnar en planið er að hafa heraga og kenna þeim að hugsa betur um líkama sína en svefn, mataræði og æfingar eru stór partur af því. Ég vil ýta þeim langt út fyrir þægindahringinn,“ segir þjálfarinn Aníta Dögg Watkins.

Aníta Dögg hefur samþykkt að þjálfa þátttakendur í hollenska raunveruleikaþættinum Next Top Model en tökur fara fram í Kaupmannahöfn á morgun.

Aníta Dögg og eiginmaður hennar, Nick Watkins, opnuðu Budz Boot Camp í Kaupmannahöfn árið 2011 í samvinnu við Boot Camp á Íslandi.

Hún er mjög stolt yfir að hafa verið beðin um að taka þátt í þessu verkefni fram yfir aðra þjálfara í Kaupmannahöfn sem vanir eru að þjálfa fyrir sjónvarp, fræga fólkið og jafnvel konungsfjölskylduna.

Spurð hvernig þetta tækifæri kom til segir Aníta að framleiðandi hollensku keppninnar, Monique Kuperus, hafi verið að leita að kvenkyns Boot Camp-þjálfara í góðu formi til að tuska stelpurnar örlítið til.

Hún segir jafnframt að þjálfunaraðferðir þeirra hjóna séu öðruvísi en gengur og gerist innan fagsins þar sem þau séu mjög meðvituð um bæði líkamlega og andlega líðan viðskiptavina sinna.

„Það er mikil hætta á anorexíu í fyrirsætuiðnaðinum og að svelta sig tilheyrir ekki hollum lífsstíl,“ segir Aníta en bætir við að flestar æfingarnar sem hún ætli að kenna stelpunum sé hægt að gera heima hjá sér eða uppi á hótelherbergi.“

Aníta Dögg hefur verið búsett í Kaupmannhöfn í þrettán ár en hún vinnur sem hárgreiðslukona tvisvar í viku ásamt því að þjálfa í Budz Boot Camp. „Ég fæ aldrei nóg af hreyfingunni og þarf endalaust að ýta mér lengra og lengra.“

Þetta er sjöunda þáttarröð hollenska raunveruleikaþáttarins. Kynnir þáttanna er Daphne Muriël Deckers, rithöfundur og fyrrverandi fyrirsæta.