Þarf að bíta í tunguna

Helgi Már Magnússon segir að það hafi reynst jafnvel erfiðara en hann átti von á að vera spilandi þjálfari KR í Dominos-deild karla. Frammistaða liðsins hefur valdið vonbrigðum á yfirstandandi tímabili og á mánudag var skipt um aðstoðarþjálfara. Gunnar Sverrisson var látinn fara og Finnur Freyr Stefánsson, þjálfari kvennaliðs KR, settur inn í hans stað.

„Það var leiðinlegt að þetta hafi bitnað á Gunnari en það þurfti að gera breytingar og þetta er sú ákvörðun sem stjórnin tók," sagði Helgi Már við Fréttablaðið.

Helgi og Finnur munu sjá um að setja upp æfingar liðsins í sameiningu en Finnur mun svo stýra þeim, sem og leikjunum. Það er gert svo að Helgi geti einbeitt sér betur að hlutverki sínu sem leikmaður.

„Ég hef kannski verið fullmikið að skipta mér af og það tók aðeins frá mér sem leikmaður. Við teljum því betra að ég einbeiti mér að því að vera leikmaður á æfingum og í leikjum," segir Helgi.

Hann segir að það sé ekki auðvelt að blanda þessum tveimur hlutverkum saman. „Ég vissi að þetta yrði krefjandi en þetta tekur svolítið á. Það eru alls konar mál utan körfuboltans sem maður þarf að pæla í en þetta er engu að síður búið að vera mjög skemmtilegt, auk þess sem reynslan er ómetanleg."

Helgi segist alltaf haft gaman að því að vera hluti af leikmannahópi í liðsíþrótt eins og körfubolta. En hann er nú í annarri stöðu en aðrir leikmenn.

„Ég hef alltaf haft mjög gaman að því gríni og glensi sem ríkir inn í klefanum. En maður hefur aðeins þurft að halda aftur af sér og bíta í tunguna. Það er kannski það helsta sem ég sakna nú," segir Helgi. „Það er stundum fín lína á milli leikmanna og þjálfara en ég þarf að vera báðum megin við hana. Ég reyni bara að gera mitt besta."

KR er í sjötta sæti deildarinnar með 20 stig, jafn mörg og Njarðvík sem er í sjöunda sæti. KR endar ekki neðar en í sjöunda sæti og ólíklegt að það nái fimmta sætinu úr þessu, enda aðeins þrjár umferðir eftir af deildarkeppninni.

KR hefur aðeins unnið tvo af síðustu sjö leikjum sínum en Helgi vonar að með breyttum áherslum í þjálfuninni horfi nú til betri vegar. „Á þessum tímapunkti ættu liðin að vera að fínpússa sinn leik en við erum kannski aðeins eftir á í því ferli. Ég er samt vel gíraður fyrir úrslitakeppnina og allt liðið líka. Þetta verður ekki auðvelt en það er ekkert annað í stöðunni en að takast á við það."

Eins og staðan í efri hlutanum er nú horfir beinast við að KR muni mæta annaðhvort Þór Þorlákshöfn eða Snæfelli, þó svo að það gæti vissulega breyst. Þjálfarar þeirra liða, Ingi Þór Steinþórsson og Benedikt Guðmundsson, eru báðir gamlir KR-ingar. „Og menn sem ólu mig upp á körfuboltavellinum," segir Helgi í léttum dúr. „Bæði lið eru vel þjálfuð og því ættu þetta að vera ansi spennandi. Við erum tilbúnir og ég tel að við verðum öðrum liðum erfiðir í úrslitakeppninni."