Búið að selja medalíuna - Silfurdrengir neita sölu

Handknattleiksleikmennirnir Sigfús Sigurðsson, Sturla Ásgeirsson og Ingimundur Ingimundarson segjast ekki vera viðriðnir sölu á silfurmedalíu frá Ólympíuleikunum í Kína árið 2008.

Á síðu Safnarmiðstöðvarinnar í gær kom fram að silfurmedalía frá Ólympíuleikunum í Kína væri til sölu. Samkvæmt nýjustu fréttum er búið að selja medalíuna. Öll spjót beinast að liðsmönnum íslenska landsliðsins en 14 leikmenn liðsins fengu silfurmedalíu á leikunum. Hvorki Bjarni Fritzson, 15. leikmaður liðsins, né Guðmundur Guðmundsson, þjálfari liðsins, fengu silfurmedalíu.

Hlýtur að hafa gilda ástæðu

„Ég er ekki að selja medalíuna mína og veit ekki hver er að selja. Þó ég vissi hver væri að selja myndi ég ekki segja það,“ segir Sigfús Sigurðsson, línumaðurinn stóri og sterki. „Hver sem ástæðan er þá hlýtur sá hinn sami að hafa gilda ástæðu fyrir því. Ég sá þetta bara á vefnum og mér brá að sjá þetta en menn hljóta að hafa sínar ástæður fyrir þessu.“

Guðmundur B. Ólafsson, formaður HSÍ, segir um leiðindamál sé að ræða. „Reglurnar eru þannig að það eru einungis leikmenn sem fá medalíu,“ segir Guðmundur. Er bannað að selja medalíuna?

„Þetta er náttúrulega bara eign manna, þeir sem eignast hana eiga hana. Við höfum engan ráðstöfunarrétt yfir henni. Við munum gera okkar besta til þess að þessi medalía fari ekki á flakk.“

Fáránlegt að selja svona grip

Vísir ræddi við nokkra leikmenn og spurði þá hvar þeirra medalía væri niðurkominn. Ekki náðist í Loga Geirsson við vinnslu þessarar fréttar. Silfurmedalía hans er á öruggum stað í verðlaunaskáp hjá FH í Hafnarfirði. Sturla Ásgeirsson, leikmaður ÍR, kom að fjöllum þegar Vísir náði tali af honum.

„Nei, það er ég svo sannarlega ekki að gera. Ég rak bara augun í þetta en hef ekki grænan grun um hver er að selja medalíuna sína," segir Sturla Ásgeirsson, hornamaðurinn knái.

„Ég veit ekki nema þetta sé eitthvað grín. Ég get ekki séð hvaða ástæðu menn hafa til að selja einhverja veðlaunamedalíu. Fæstir sem unnu til verðlaunanna hafa tækifæri til að vinna til þeirra aftur," segir Sturla. „Í mínum huga er fáránlegt að selja svona grip. Það hvarflar að minnsta kosti ekki að mér."

Diddi geymir sína á öruggum stað

Varnarmaðurinn Ingimundur Ingimundarson tekur í svipaðan streng. „Silfurmedalían mín er á öruggum stað. Ég er ekki að selja og það hefur aldrei hvarflað að mér,“ segir Ingimundur eða Diddi eins og hann er jafnan kallaður. „Þetta er leiðinlegt mál ef rétt reynist. Ég trúi því eiginlega varla að einhver okkar sé að selja silfurmedalíuna sína.“

Í hádegisfréttum Bylgjunnar kom fram að HSÍ ætlaði að gera allt sem það getur til að koma í veg fyrir að silfurmedalían fari á flakk. Ingimundur telur að HSÍ hafi ekki efni á því að kaupa medalínuna. „Ef að HSÍ hefur varla efni á því að senda landsliðið á stórmót þá hafa þeir svo sannarlega ekki efni á að borga tvær milljónir fyrir silfurmedalíu.“