Beyonce gaf óvænt út plötu á miðnætti

Poppdrottningin Beyonce kom aðdáendum sínum rækilega á óvart á miðnætti þegar hún gaf út nýjustu plötu sína sem heitir einfaldlega Beyonce. 

„Mig langaði ekki að gefa út tónlistina mína eins og ég hef gert. Ég er komin með leið á því. Mér finnst ég geta talað beint við aðdáendur mína,“ segir Beyonce í fréttatilkynningu.

Þessi fimmta sólóplata söngkonunnar var gefin út á iTunes í Bandaríkjunum og er því ekki fáanleg enn á Íslandi. Beyonce er þó byrjuð að leka efni inn á Youtube fyrir okkur sem búum ekki vestan hafs.

Á Beyonce er að finna fjórtán lög og sautján myndbönd. Á plötunni vann hún með listamönnum á borð við Drake, Pharrell Williams, Justin Timberlake, Frank Ocean og fyrrum liðsmönnum Destiny's Child - Michelle Williams og Kelly Rowland. Auðvitað kemur eiginmaður hennar, rapparinn Jay Z, líka við sögu.