Ný verksmiðja Promens opnuð í Kína

Jakob Sigurðsson, forstjóri Promens, gangsetti nýja verksmiðju fyrirtækisins við hátíðlega athöfn í Taicang í Kína 30. nóvember síðastliðinn. Markaði athöfnin upphaf framleiðslu Promens í Kína, en einnig voru drög að frekari fjárfestingum fyrirtækisins á svæðinu kynnt.

Hermann Þórisson, stjórnarformaður Promens, undirritaði á sama tíma viljayfirlýsingu um stækkun verksmiðjunnar við Wang Hong Xing, formann kommúnistaflokksins í Chengxiang.

Fram kemur í tilkynningu frá Promens að Jakob Sigurðsson hafi lagt áherslu á að verksmiðjan marki stórt skref í framtíðaráætlunum félagsins við að styrkja stöðu sína á ört vaxandi mörkuðum. „Framleiðslueining Promens í Taicang skapar góðan grundvöll fyrir bætta þjónustu við bæði kínverska og alþjóðlega viðskiptavini fyrirtækisins, þar sem við vinnum í nánu samstarfi við viðskiptavini allt frá frumhugmynd til framleiðslu.“

„Gangsetning verksmiðjunnar í Taicang er einungis fyrsti áfangi af nokkrum sem fyrirhugaðir eru. Fyrsti áfanginn byggist á hverfisteyptum vörum, svo sem einangruðum kerum og mun til að byrja með fyrst og fremst þjóna fyrirtækjum í matvælaiðnaði. Snemma á næsta ári hefst svo framleiðsla á vörum fyrir bílaiðnað. Hverfisteypa hefur verið þungamiðjan í framleiðslu Promens síðan fyrirtækið var stofnað á Dalvík árið 1984 og sama tækni hefur verið grundvöllur starfsemi fyrirtækisins í Asíu hingað til,“ segir einnig í tilkynningunni.