Þjónustuver 365: „Brjálað að gera hjá okkur“

„Það er vægast sagt allt brjálað að gera hjá okkur - alveg frá því að tilboðið kom út á föstudaginn,“ segir Ásta Reynisdóttir, forstöðumaður áskrifta- og þjónustusviðs 365. „Ég hef starfað hjá fyrirtækinu í tíu ár og ég man ekki eftir svona.“

Mikil ásókn er í nýtt áskriftartilboð Stöðvar 2 en í því felst meðal annars að internet og heimasími fylgja frítt með í kaupbæti.

Álagið á þjónustuver 365 hefur verið slíkt að kalla þurfti út aukamannskap, meðal annars sjónvarpsstjörnunar Loga Bergmann, Sindra Sindrason og Valtý Björn Valtýsson.

„Það voru ansi margir komnir á bið og kölluðum á annað fólk í húsinu. Hér eru allir boðnir og búnir að vinna saman,“ segir Ásta. „Það eru allir að hjálpast að og þetta er ótrúlega skemmtilegt.“

Vegna álagsins er fólki einnig bent á vef þjónustuversins en þar er hægt að kaupa áskrift með einföldum hætti.