Hannes Jón spilar ekki meira á árinu

Aðalsteinn Eyjólfsson, þjálfari þýska úrvalsdeildarfélagsins Eisenach, hefur staðfest að Hannes Jón Jónsson verði hvíldur fram yfir áramót vegna meiðsla.

Hannes Jón hefur verið að glíma við meiðsli í bæði öxl og hné í langan tíma. „Við þurfum á honum að halda á seinni hluta tímabilsins og viljum að hann verði þá heill heilsu,“ sagði Aðalsteinn við þýska fjölmiðla.

Hann missir því af síðustu fjórum leikjum ársins en eftir það fer deildin í Þýskalandi í frí á meðan EM í Danmörku stendur yfir.

Hannes Jón greindist með krabbamein í okóber í fyrra en sneri aftur strax í janúar. Eisenach komst upp úr þýsku B-deildinni um vorið og Hannes Jón var kjörinn besti leikmaður tímabilsins.