Lélegur seinni hálfleikur hjá Björgvini Páli og félögum

Björgvin Páll Gústavsson og félagar í Bergischer töpuðu með tveimur mörkum á móti Lemgo, 27-29, í þýsku úrvalsdeildinni í handbolta en Lemgo-liðið var fimm sætum neðar í töflunni fyrir leikinn. Skelfileg byrjun Bergischer í seinni hálfleik var örlagavaldur í leiknum.

Bergischer byrjaði tímabilið frábærlega en hefur verið að gefa eftir upp á síðkastið. Liðið vann leikinn á undan en það var eini sigurleikur liðsins í síðustu sex leikjum.

Alexander Oelze var markahæstur hjá Bergischer með sjö mörk og Duje Miljak skoraði sex mörk. Finn Lemke var markahæstur hjá Lemgo með níu mörk.

Bergischer komst fjórum mörkum yfir í fyrri hálfleiknum og var síðan 17-14 yfir í hálfleik. Eftir ellefu mínútna leik í seinni hálfleik var Lemgo komið yfir í 21-18 eftir 7-1 sprett. Lemgo náði síðan mest sex marka forskoti í seinni hálfleik en Bergischer náði að minnka muninn í lokin.