Beinkonbræðaralagið safnaði tveimur milljónum

Aðstandendur hátíðarinnar Reykjavík Bacon Festival, sem fram fór 7. september síðastliðinn, söfnuðu tveimur milljónum króna sem renna til Landspítalans. Hátíðin tókst vonum framar en um 25 þúsund manns heimsóttu hátíðina.

Fjárhæðin sem safnaðist mun renna til kaupa á tveimur þráðlausum hjartasíritum sem verða afhent hjartadeild Landspítalans við formlega athöfn síðar í þessum mánuði.

„Við í Beikonbræðralaginu viljum sýna hjartadeildinni og öllu því frábæra starfsfólki sem þar vinnur þakklæti fyrir gott starf við afar erfiðar aðstæður á tímum niðurskurðar. Við viljum þakka styrktaraðilum okkar fyrir veittan stuðning og ekki síst þeim fjölmörgu veitingastöðum sem tóku þátt í þessu með okkur. Án þeirra aðkomu hefði hátíðin ekki orðið að veruleika en einnig viljum við þakka íslensku þjóðinni fyrir að koma á hátíðina og leggja málefninu lið,” segir Ragnar Þór Ingólfsson beikonbróðir.

Vantar sextán hjartasírita

Bylgja Kærnested hjúkrunardeildarstjóri Hjartadeildar Landspítalans segir búnaðinn koma sér vel. „Þetta er mikilvægur búnaður og kemur sér því afar vel. Hjartadeild hefur ekki farið varhluta af þeim mikla niðurskurði sem hefur verið á spítalanum síðastliðinn ár,” segir Bylgja.

Á deildina leggjast inn um 2000 hjartasjúklingar á hverju ári og meðal legutími þeirra er aðeins 5,5 dagar. Þeir sjúklingar sem leggjast inn á hjartadeildina eru oft mjög veikir og þurfa að vera undir stöðugu eftirliti meðal annars í svokölluðum hjartasíritum. Þeir sjúklingar sem ekki lengur eru rúmfastir en þurfa engu að síður að vera tengdir við hjartasírita eru tengdir við þráðlaus tæki og geta farið aðeins fram úr rúmi. Þetta er mikilvægt skref í meðferð sjúklinganna og er geysilega mikið notað. Á vel flestum hjartadeildum erlendis er slíkt tæki við öll rúmstæði sjúklinga en svo er ekki hér.

„Við höfum aðeins sextán þráðlaus tæki, sem sum eru komin til ára sinna þó þörfin sé mun meiri en deildin rúmar þrjátíu og tvo sjúklinga. Skortur á þráðlausum hjartasíritum verður því stundum til þess að sjúklingar eru rúmfastir lengur en þeir þurfa sem er ekki æskilegt. Kostnaður við hvert þráðlaust tæki er kr. 1.014.650,- og vantar okkur því sextán til viðbótar ef vel ætti að vera,” segir Bylgja.

Beikonbræðralagið skorar á fyrirtæki og félagasamtök að leggja þessu málefni lið. „Með samstilltu átaki tekst okkur að fjármagna kaup á þeim fjórtan tækjum sem eftir standa af þeim sextán sem hjartadeildinni nauðsynlega vantar. Við skorum á aflögufær fyrirtæki að gefa að minnsta kosti eitt tæki hvert, þangað til markmiðinu er náð fyrir hjartadeild Landspítalans”, segir Ragnar Þór.