Læknar segja starfsánægju hverfandi

Íslenskir læknar sem búsettir eru erlendis lýsa yfir þungum áhyggjum af ástandi íslenska heilbrgðiskerfisins. Á aðalfundi Læknafélags Íslands í gær afhenti Þorbjörn Jónsson, formaður Íslenska læknafélagsins, Kristjáni Þór Júlíussyni heilbrigðisráðherra yfirlýsingu sem undirrituð er af 141 íslenskum lækni. Læknarnir eru allir búsettir erlendis og er ýmist í sérnámi eða orðnir sérfræðilæknar.

Í yfirlýsingunni er bent á að laun lækna hafi dregist aftur úr launum sambærilegra stétta bæði á almennum vinnumarkaði og hjá ríkinu, segja starfsumhverfi lækna vera óásættanlegt og starfsánægju hverfandi.

Læknarnir óska eftir skýrum línum frá stjórnvöldum hvað varðar þær aðgerðir sem þau hyggjast fara í til bjargar Landspítalanum og íslenska heilbrigðiskerfinu. Fyrir sérfræðilækna erlendis sé afar erfið tilhugsun að snúa heim í þá óvissu sem nú ríki.