Tíu íslenskir leikmenn á topp 20 í framlagi í fyrstu umferð

KFÍ-maðurinn Jason Smith var með hæsta framlagið í fyrstu umferð Dominos-deildar karla í körfubolta sem lauk í gærkvöldi. Emil Barja, 22 ára leikstjórnandi Hauka, kom best út af íslensku leikmönnum deildarinnar en hann var með þrefalda tvennu í sigri á Val.

Emil Barja var með 31 framlagsstig í 85-70 sigri á Val en þessi öflugi strákur var með 11 stig, 13 fráköst, 10 stoðsendingar, 5 stolna bolta og 2 varin skot í leiknum auk þess að tapa aðeins einum bolta á 33 mínútum.

Jason Smith var langhæstur á framlagslistanum enda fékk hann 48 framlagsstig fyrir sinn fyrsta leik í Dominos-deildinni. Smith var með 41 stig í 98-106 tapi KFÍ á móti Njarðvík á Ísafirði en auk stiganna var þessi ára 30 ára bakvörður með 7 fráköst, 7 stoðsendingar og 2 stolna bolta. Smith hitti úr 4 af 6 þriggja stiga skotum sínum og alls rötuðu 13 af 18 skotum hans utan af velli rétta leið.

Það eru alls tíu íslenskir leikmenn sem komust inn á topp tuttugu listann í framlagi í fyrstu umferðinni þar af voru fjórir þeirra meðal tíu efstu. Þeir sem komust inn á topp tíu listann voru auk Emils þeir Björgvin Hafþór Ríkharðsson, bakvörður ÍR, Jón Ólafur Jónsson, framherji Snæfells og Ragnar Ágúst Nathanaelsson, miðherji Þór Þorlákshafnar.

Hæsta framlag leikmanna í 1. umferð Dominos-deildar karla:

1. Jason Smith, KFÍ     48

2. Michael Craion, Keflavík     38

3. Terrence Watson, Haukar     37     

4. Mike Cook Jr., Þór Þ.     35

5. Emil Barja, Haukar     31     

6. Mychal Green, Skallagrímur     30     

7. Björgvin Hafþór Ríkharðsson, ÍR     29     

8. Jón Ólafur Jónsson, Snæfell     28     

8. Ragnar Ágúst Nathanaelsson, Þór Þ.     28     

10. Nigel Moore, Njarðvík     27     

11. Terry Leake Jr., ÍR     26     

11. Páll Axel Vilbergsson, Skallagrímur     26     

11. Chris Woods, Valur     26     

14. Shawn Atupem, KR     23     

15. Sveinbjörn Claessen, ÍR     22     

15. Mirko Stefán Virijevic, KFÍ     22     

17. Snorri Hrafnkelsson, Njarðvík     20     

17. Davíð Páll Hermannsson, Haukar     20     

17. Nemanja Sovic, Þór Þ.     20     

20. Helgi Már Magnússon, KR         19