Kaffitár í samstarf við Söguhring kvenna

Kaffitár fékk til liðs við sig íslenskar og erlendar konur sem eru meðlimir í Söguhring kvenna,  til þess að hanna nýjar umbúðir á kaffipakkningar fyrir fyrirtækið.

Söguhringurinn (e. The Women's Story Circle) er samstarfsverkefni Samtaka kvenna af erlendum uppruna og Borgarbókasafnsins, verkefnið hefur verið í gangi síðustu fimm ár.

Kristín R. Vilhjálmsdóttir sem er verkefnastjóri fjölmenningar á Borgarbókasafni,  segir að auglýsingastofan sem sér um hönnun fyrir Kaffitár hafi haft samband við sig síðasta vor til að athuga hvort Söguhringurinn væri til í að vinna að hönnun kaffipakka.

„Þau höfðu séð listaverk sem Söguhringurinn gerði 2011. Það verk var gjöf til Mannréttindaskrifstofu Reykjavíkurborgar og er orðið tákn fyrir fjölmenningu í Reykjavík. Listaverkið sýnir kort af Reykjavík og er með persónulegum táknum þeirra kvenna sem tóku þátt í að búa það til,“ segir Kristín.

Kristín ákvað eftir að hafa ráðfært sig við Lilianne Vorstenbosch, myndlistakennara sem var leiðbeinandi við gerð fyrra verksins, að slá til. Konurnar byrjuðu á verkinu um miðjan ágúst og því var lokið um miðjan september.

Listaverkið er Íslandskort með táknum kvennanna. Sum táknin eru persónuleg, sum tengjast heimalandi kvennanna en önnur Íslandi. Margar þessa kvenna hafa búið lengi á Íslandi og því er það þeim efst í huga.

„Þetta eru allskonar tákn, blóm, dýr, kaffibollar og hvað sem hverri dettur í hug. Það má segja að með þessu verki sé heimsmenningin komin á landakortið,“ segir Kristín. Listaverkið hangir við Kaffitár á Þjóðminjasafni Íslands.

Kaffitár gaf Söguhringnum styrk í staðinn fyrir vinnuna og hann verður nýttur í áframhaldandi starf Söguhringsins. „Á næstunni ætlum við að leggja áherslu á leiklist.“

Það er von á nýju kaffipakkningunum frá Kaffitár eftir áramót. „Þetta var auðvitað rosalega gaman að sjá hvernig listasköpun skapar gleði og tengingar á milli þeirra sem taka þátt. Sköpun er leið til að tengja saman ólíka menningarheima.“

"Þetta er ótrúlega flott framlag allra þeirra sem tóku þátt, konurnar lögðu allar sitt að mörkum til að gera þetta sem fallegast og allar konurnar eru með áhugaverða og persónulega sögu á bak við sitt tákn," segir Kristín.