Seðlabankinn heldur vöxtum óbreyttum

Peningastefnunefnd Seðlabanka Íslands ákvað í morgun að halda vöxtum bankans óbreyttum en stýrivextir bankans standa nú í sex prósentum. Í uppfærðri spá sem birtist í ritinu Peningamál í morgun er gert ráð fyrir að hagvöxtur verði tæplega tvö prósent, en það er svipað og spál var í maí.

Hagvaxtarhorfur hafa hinsvegar versnað að mati bankans næstu tvö árin og því er gert ráð fyrir tæplega þriggja prósenta hagvexti en ekki ríflega, á því tímabili. Þetta er einkum rakið til minni fjárfestinga í orkufrekum iðnaði næstu misserin. Þá hefur bati á vinnumarkaði reynst kröftugri en spáð var fyrir í maí og er gert ráð fyrir batinn haldi áfram.

„Samkvæmt spánni mun verðbólga aukast lítillega á seinni hluta ársins en taka að hjaðna á ný í átt að markmiði frá og með byrjun næsta árs. Verði launahækkanir í samræmi við verðbólgumarkmið mun verðbólga að öðru óbreyttu hjaðna hraðar og vextir verða lægri en ella,“ segir ennfremur í yfirlýsingu Peningastefnunefndar.

Þá segir að stefna um viðskipti Seðlabankans á gjaldeyrismarkaði sem kynnt var í maí hafi stuðlað að minni sveiflum krónunnar og litlar breytingar hafa orðið á gengi hennar frá síðasta fundi peningastefnunefndar. Enn sem komið er hafi sú þróun þó ekki leitt til lækkunar verðbólguvæntinga.

„Peningastefnan hverju sinni þarf að taka mið af stefnunni í opinberum fjármálum og öðrum þáttum sem hafa áhrif á eftirspurn í þjóðarbúskapnum. Óvissa ríkir um áform í opinberum fjármálum á komandi árum en þau munu skýrast með fjárlagafrumvarpi í byrjun október. Brýnt er að jöfnuður náist á ríkissjóði sem fyrst þannig að samspil stefnunnar í peninga- og ríkisfjármálum stuðli með sem minnstum tilkostnaði að ytra jafnvægi þjóðarbúsins, efnahagslegum stöðugleika og verðbólgu í samræmi við markmið,“ segir einnig.

Nefndin bætir því við að laust taumhald peningastefnunnar hafi á undanförnum misserum stutt við efnahagsbatann. „Áfram gildir að eftir því sem slakinn hverfur úr þjóðarbúskapnum er nauðsynlegt að slaki peningastefnunnar hverfi einnig. Að hve miklu leyti aðlögunin á sér stað með breytingum nafnvaxta Seðlabankans fer eftir framvindu verðbólgunnar, sem ræðst að miklu leyti af þróun launa og gengishreyfingum krónunnar,“ segir að lokum.