David Byrne tók reiðhjólið með til Íslands

David Byrne, fyrrverandi forsprakki hljómsveitarinnar Talking Heads, kom til landsins í morgun. Hann segist ætla að taka því rólega með dóttur sinni, kynnast íslenskri tónlist, menningu ásamt því að hjóla um Reykjavík og fræðast um efnahagshrunið.

David Byrne er einn áhrifamesti tónlistarmaður samtímans en hann heldur stórtónleika í Háskólabíói, sunnudaginn næstkomandi, ásamt Annie Clarke, eða St. Vincent.

Eftir að Talking Heads lagði upp laupana árið 1991 hefur sólóferill Byrnes blómstrað. Samstarf hans og St. Vincent, hefur vakið mikla athygli en þar blanda tónlistarmennirnir saman ólíkum stefnum úr heimi brasstónlistar og fönki.

„Það hljómaði ekki eins og ég og ekki eins og hún, það hljómaði eins og eitthvað nýtt fyrir okkur. Nú flytjum við eitthvað af þessu efni og eitthvað að gamla efninu okkar, nokkur Talking Heads-lög og fleiri lög eftir mig, eitthvað af gömlu lögunum hennar. Með þessum málmblásturshljóðfærum er hljómurinn mjög góður. Við erum líka með spor fyrir blásarana, það er mikil hreyfing."

Byrne hefur sótt Ísland heim fjórum sinnum en hann hélt minnistæða tónleika í Háskólabíói árið 1991.

Líkt og hann gerði þá hefur Byrne reiðhjólið með í för enda er hann sérstakur áhugamaður um reiðhjólið og þykir fátt skemmtilegra en að hjóla um Reykjavík. Hann var nýkominn úr hjólreiðatúr þegar fréttastofa hitti á hann.

Byrne segir öfluga hjólreiðamenningu vera vitnisburð um lifandi borg.

„Ef fólk getur það er það frábær leið til að fara í vinnuna, frábær leið til að ferðast um borgina. Í New York hafa þeir bætt við öruggum, eða öruggari reiðhjólakgreinum, sem gerir þetta auðveldara. Maður stofnar ekki lífi sínu í hættu í hvert skipti sem maður fer út."

Næstu daga mun Byrne ferðast um landið ásamt dóttur sinn og kynna sér það nýjasta í íslenskri tónlist og menningu.

„Ég tók hana með því hér er fallegt, þótt það sé rigning núna. Ég held að sólin láti sjá sig eftir einn eða tvo daga. Ég hef áhuga á mörgu öðru. Auðvitað er enn ótrúleg tónlistar- og listmenning hérna. Ég hef lesið margvíslegar skoðanir á því hvernig Ísland lifði bankakreppuna af. Skoðanir eru mjög skiptar um það.“