Hélt að það væri kominn 1. apríl

Talsmaður Alþjóðadýraverndunarsjóðsins á Íslandi segir þá hugmynd að hefja hnúfubaksveiðar á nýjan leik eina vitlausustu hugmynd sem hann hafi heyrt lengi.

Á forsíðu Fréttablaðsins í dag hvetur Gunnar Bergmann, framkvæmdastjóri Hrefnuveiðimanna, til þess að hafnar verði veiðar á hnúfubaki.

Hvalasérfræðingur hjá Hafrannsóknarstofnun segir skynsamlegt að leyfa veiðarnar í vísindaskyni.

Sigursteinn Másson er talsmaður Alþjóðadýraverndunarsjóðsins á Íslandi.

„Ef að það væri ekki 1. ágúst hefði maður haldið að það væri 1. apríl vegna þess að þetta eru hugmyndir sem ná ekki nokkurri átt. Þessi hugmynd Hrefnuveiðimanna er ein sú vitlausasta sem ég hef nokkurn tímann heyrt úr þeirri áttinni, og þó er nú margt sem hefur gengið á,“ segir hann.

„Það er ekki hægt að taka þetta alvarlega. Þetta er annars vegar einhverskonar ögrun í garð ferðaþjónustunnar í landinu en líka er þetta örvænting sem birtist í svona hugmynd, athygliþörf og eitthvað slíkt. Þetta er bara af þeirri gerðinni að það er ekki hægt að taka þetta alvarlega."

Sigursteinn segir að árið 2003 hafi vísindaveiðar á hrefnu hafist.

„Og við sögðum alltaf að þær væru undanfari atvinnuveiða og það reyndist rétt því veiðarnar hófust þremur árum síðar. Ef að menn ætla að hefja vísindaveiðar á hnúfubak þá myndi það kalla yfir Ísland alþjóðlega fordæmingu. Það myndi vera mjög skaðlegt íslenskum hagsmunum, ekki aðeins fyrir ferðaþjónustuna og ímynd Íslands, heldur í miklu víðara samhengi en það.“

Sigursteinn segir að Hnúfubakurinn njóti víðtækrar alþjóðlegrar verndar í alþjóðasáttmálum og lögum. Hann sé hvergi veiddur í atvinnuskyni, né í vísindaskyni.

„Þær [innsk.blm. veiðarnar] myndu aldrei verða samþykktar á vettvangi alþjóðlega hvalveiðiráðsins, að veita einhverkonar undanþágu til Íslendinga til veiða á hnúfubak. Þar fyrir utan þá er það einfaldlega þannig að hér er að hrannast upp hvalkjöt í landinu sem er ekki hægt að flytja úr landi. Ef menn ætla síðan að fara bæta þessu við, þá náttúrulega væri það svo fráleitt að engu tali tekur.“