Franskar landsliðsstjörnur fyrir dóm

Franck Ribery og Karim Benzema þurfa að svara fyrir ákærur um að hafa greitt ólögráða stúlku fyrir kynlífsþjónustu á næstunni.

Mál þeirra verður tekið fyrir í dómssal í París í dag en báðir neita þeir sök. Umrædd stúlka heitir Zahia Dehar og hefur sagt að hvorugur leikmaður vissi að hún væri undir átján ára aldri á þeim tíma.

Dehar er í dag 21 árs gömul og landsþekkt í Frakklandi eftir að málið kom upp. Hún er nú að koma á fót eigin tískuvörumerki.

Verði þeir Ribery og Benzema, sem leika með Bayern München og Real Madrid, dæmdir sekir eiga þeir von á allt að þriggja ára fangelsisdómi og sekt upp á rúmar sjö milljónir króna.

Ribery hefur viðurkennt að hafa stundað kynlíf með Dehar í München árið 2009 en þá var hún sautján ára gömul.

Benzema neitar því að hafa átt náin kynni með Dehar en sjálf hefur hún sagt að kappinn hafi greitt sér fyrir kynlífsþjónustu árið 2008, er hún var einungis sextán ára.

Hún segist þó að hafa logið að þeim báðum um aldur sinn.