Heiða söngkona orðin flugfreyja

Heiða Ólafsdóttir söng- og leikkona með meiru er byrjuð að vinna sem flugfreyja hjá Icelandair. Hún var ráðin sem sumarstarfsmaður af 1400 umsækjendum. Ekki nóg með að hún líti vel út í flugfreyjubúningnum heldur er hún að fíla starfið í tætlur. 

Sumarstarfsmaður

„Ég er sumarstarfsmaður hjá Icelandair, sem sagt júní, júlí og ágúst. Þau auglýstu í nóvember, 1400 manns sóttu um og svo tóku við próf og niðurskurðir og svo kom í ljós í febrúar eftir lokaniðurskurð að ég var ein af þeim sem fékk ráðningu. Ég fór svo á 7 vikna námskeið núna í vor þar sem ég lærði ótrúlega mikið hjá frábærum kennurum og kynntist æðislegu fólki í bekknum mínum," segir Heiða.

Ánægð í háloftunum

Hvernig líst þér á nýja starfið? „Mér líst alveg rosalega vel á nýja starfið, finnst þetta mjög skemmtilegt og hlakka strax til að fljúga meira," svarar hún nýlent frá Frankfurt.

„Ég sé strax að þetta er sko algjörlega starf fyrir mig og sem hentar mér. Þannig að ég er rosalega spennt fyrir sumrinu og spennt fyrir því að láta farþegum Icelandair líða sem best um borð," segir þessi hæfileikaríka söngkona.

Ætlar að syngja meira 

Hvað með tónlistar- og leiklistarferilinn? „Planið í tónlistinni er að fara að flytja mína eigin tónlist. Nú ætla ég að klára milljón laga og textahugmyndir eftir mig. Ég finn mikla þörf til þess að syngja eitthvað sem kemur beint frá mínu hjarta."

Heiða lenti í 2. sæti í Idolinu sælla minninga árið 2005 og sama ár gaf hún út sína fyrstu sólóplötu hjá Senu. Hún lærði leiklist í New York og útskrifaðist árið 2009. Undanfarin ár hefur Heiða starfað mikið í söngleikjum eins og Buddy Holly í Austurbæ, Bjart með Köflum og Vesalingunum í Þjóðleikhúsinu og svo starfar hún sem útvarpskona á Rás 2 um helgar líka og mun halda því áfram með flugfreyjustarfinu.