Kimi útskýrir hvernig skal vinna nakinn í heitum potti

Boðskortið á snekkjuna hans Kimi Raikkönen í Mónakó virðist ekki hafa tilgreint æskilegan klæðnað því þegar félagar hans frá Finnlandi komu í heimsókn höfðu einhverjir gleymt sundskýlunni.

Kimi lét það ekki á sig fá þó allir færu naktir í heita pottinn á snekkjunni sinni og drakk öl á meðan hann svaraði spurningum fyrir finnska fíflalátahópinn The Dude Sons.

Meðal þeirra spurninga sem hann var beðinn um að svara var hvernig eigi að vinna. Svarið var auðvelt fyrir Kimi: "Vertu bara fljótastur."

The Dude Sons fara fögrum orðum um Kimi og segja hann vera hressan og til í fjörið. "Hann kann að segja sögur," segir einn úr hópnum. Kimi hefur hins vegar ekki verið þekktur fyrir miklar frásagnir í fjölmiðlum.

"Hann bara fílar ekki fjölmiðlasirkusinn," segja The Dude Sons enn fremur.

Hér að ofan má sjá stórkoslegt myndband af The Dude Sons í heita pottinum með Kimi að flassa ferðamenn og lögreglumann sem lítur kurteislega undan.