Yfir 80% vilja taka málið upp aftur

Langflestir landsmenn eru þeirrar skoðunnar að taka eigi Guðmundar- og Geirfinnsmál upp að nýju fyrir íslenskum dómstólum. Þetta sýnir ný könnun Stöðvar 2 og Fréttablaðsins.

Sonur Sævars Ciecelskis segir niðurstöðuna bera vott um að sleggjudómar síðustu ára séu á undanhaldi.

Könnunin var framkvæmd í lok síðustu viku og var spurt, Finnst þér að taka ætti upp Guðmundar- og Geirfinnsmálið á ný fyrir íslenskum dómstólum?, en í lok marsmánaðar skilaði starfshópur á vegum ríkisins af sér viðamikilli skýrslu þar sem eindregið er mælst til þess að yfirvöld taki málin upp að nýju.

Stærstur hluti almennings virðist sammála nefndarmönnum ef marka má niðurstöður könnunarinnar. Af þeim sem tóku afstöðu sögðu 81% já og 19% nei.

Enginn munur var á afstöðu eftir búsetu fólks en yngra fólk var aðeins hlynntara endurupptöku. 84% átján til fjörtíu og níu ára svöruðu játandi en 78% fimmtíu ára og eldri.

Ekki var heldur afgerandi munur eftir pólitískri afstöðu. Fólk í flestum flokkum var mjög hlynnt upptöku, en minnstur stuðningur var hjá sjálfstæðismönnum, 64% þeirra svöruðu játandi á meðan afstaða fólks sem kaus aðra flokka var frá 80% til 100%.

Sigríður J. Friðjónsdóttir ríkissaksóknari segir að engin ákvörðun hafi verið tekin um endurupptöku málsins. Í samtali við fréttastofu segir hún talsverða vinnu vera framundan við að yfirfara gögn til þess að unnt sé að taka upplýsta ákörðun í málinu.

Hafþór Sævarsson er sonur Sævars Ciecielskis, sem á sínum tíma var dæmdur í lífstíðarfangelsi fyrir aðild sína að málinu.

Sævar barðist lengi fyrir því að málið yrði tekið upp að nýju en því var endanlega hafnað árið 1996.

„Ég fagna því og ég er mjög þakklátur fyrir þann stuðning sem við höfum fundið fyrir. Ég held að sleggjudómar síðustu ára séu svolítið að fjara út og skýrsla starfshópsins er liður í því, myndin er að verða skýrari," segir hann.

Sævar faðir Hafþórs er látinn og sama er að segja um annan sakborning í málinu, Tryggva Rúnar Leifsson.

Samkvæmt núgildandi lögum verða þeirra mál ekki tekin upp að nýju, nema lagabreyting komi til. Hafþór vonast til að ráðist verði í slíka breytingu.