Þorvaldur Davíð skoðar sögusvið glæpasagna

Leikarinn Þorvaldur Davíð Kristjánsson er staddur á Siglufirði um helgina, en samkvæmt heimildum Vísis hyggst hann kynna sér sögusvið glæpasagna Ragnars Jónassonar, Snjóblindu, Myrknættis og Rofs, og hitta heimamenn.

Í desember var greint frá því að Saga Film og Þorvaldur hefðu tryggt sér réttinn til þess að breyta sögunum í sjónvarpssyrpur. Siglufjörður leikur lykilhlutverk í bókunum, en Þorvaldur hyggst þar leika aðalsöguhetjuna, lögreglumanninn Ara Þór Arason. Saga Film verður aðalframleiðandi þáttanna og mun Þorvaldur starfa með þeim að framleiðslunni.

Þorvaldur er að öðru leyti önnum kafinn þessa dagana við tökur á kvikmynd Baldvins Z, Vonarstræti, sem frumsýnd verður í haust. Vonarstræti gerist í Reykjavík árið 2006 og þar fer Þorvaldur Davíð með hlutverk fyrrum knattspyrnumanns sem hefur haslað sér völl í viðskiptaheiminum.