Ólæti í drukknum ferðamanni kostaði vist í fangaklefa

Lögreglan þurfti þrívegis að hafa afskipti af sama drukkna erlenda ferðamanninum í miðborginni i gærkvöldi.

Fyrst var hún kölluð að hóteli í miðborginni þar sem hann dvelur, þar sem hann lét dólgslega. Hann lofaði bót og betrun og að hann skyldi fara strax að sofa.

En aðeins tuttugu mínútum síðar barst tilkynning frá öðru hóteli, þar sem sami maður, sem er tvítugur Norðurlandabúi, var með uppsteit, en honum hafði verið hent út áður en lögregla kom á vettvang.

Innan við hálftíma síðar barst tilkynning frá fyrra hótelinu vegna sama manns, sem var þá að skemma innanstokksmuni og angra starfsfólk. Þraut þá þolinmæði lögreglunnar, sem stakk honum í steininn.