Tjón á lögreglubifreiðum stórminnkað eftir hrun

Kostnaður vegna tjóns á lögreglubifreiðum hefur stórminnkað síðastliðin ár samkvæmt samantekt ríkislögreglustjóra sem finna má á heimasíðu embættisins.

Þar kemur fram að árið 2008 hafi 168 tjón verið skráð en kostnaður vegna þessa voru 13 milljónir króna. Tjónum hefur farið fækkandi árlega síðan þá. Árið 2009 voru tjónin 108, árið eftir 96 og svo 80 árið 2011.

Árið 2012 eru tjónin aftur á mótið komin niður í 33 en kostnaður vegna þessa er um fjórar og hálf milljón króna.

Ríkislögreglustjóri skipaði starfshóp til þess að hafa eftirlit með öllu því er varðar ökutæki lögreglunnar og tækjabúnað árið 2008.

Sá starfshópur telur að helsta ástæða þess að tjónum hafi fækkað svo mikið á milli ára sé töluvert minni notkun bifreiðanna frá hruni árið 2008.

Þá telur hópurinn að námskeið í forgangsakstri skili betra vinnulagi og breyttu hugarfari. Einnig er í skýrslu hópsins nefnt að aukinn öryggisbúnaður á lögregluökutækjum lágmarki skemmdir.

Loks er tiltekið að aukið aðhald frá starfshópi ríkislögreglustjóra og samvinna hópsins við lögreglustjóra í landinu hafi orðið til að draga úr tjónum.

Flest tjón á ökutækjum lögreglunnar verða þegar lögreglumenn sinna venjulegu löggæslueftirliti. Má því í mörgum tilfellum flokka tjónin undir óvarkárni ökumanna þegar ekið er utan í hluti eða á önnur ökutæki og skemmdir verða á undirvagni af hraðahindrunum og kantsteinum.