30% fjölgun ferðamanna í janúar

Erlendir gestir í janúar hafa aldrei verið fleiri frá því að Ferðamálastofa hóf talningar í Leifsstöð fyrir rúmum áratug. Frá þessu greinir Ferðamálastofa.

Um 34 þúsund erlendir gestir fóru frá landinu í janúar og er um að ræða 7.800 fleiri brottfarir en í sama mánuði árið 2012. Það svarar til 30 prósenta fjölgunar á milli ára.

Langflestir ferðamenn koma frá Bretlandi eða 10.188 sem svarar til 30 prósenta allra ferðamanna. Næstflestir komu frá Bandaríkjunum eða um 15 prósent. Mest fjölgun á milli ára var þó á þýskum ferðamönnum sem fjölgaði um 64% eða úr 1.272 í 2.082.

Sá fyrirvari er gerður við upplýsingarnar um þjóðerni að tölurnar gætu breyst lítillega. Ástæðuna má rekja til óútskýrðs munar á tölum Ferðamálastofu og farþegatölum hjá Keflavíkurflugvelli.