Lögðu hald á lítra af sterum - efnið merkt sem hnetuolía

Tollgæslan haldlagði í síðustu viku tæpan lítra af sterum, eða 950 millilítra, sem voru sendir til landsins frá Hong Kong. Þetta kemur fram á vef tollgæslunnar.

Um var að ræða hreina stera í brúsa sem búið var um í pappakassa sem barst hingað í bögglapóstsendingu. Á fylgiseðli með sendingunni stóð að um væri að ræða hnetuolíu.

Sterasendingin var stíluð á einstakling á þrítugsaldri á höfuðborgarsvæðinu. Lögreglan á höfuðborgarsvæðinu rannsakaði málið og handtók innflytjandann. Hann viðurkenndi að hafa ætlað sterana til sölu og telst málið upplýst.

Tollgæslan hafði áður haldlagt tæki og tól til að steypa steratöflur og loka ambúlum, sem notaðar eru undir stera í sölu. Hver ambúla tekur um einn millilítra. Hreinir sterar eru gjarnan blandaðir allt að til helminga með olíu, eða notaðir til matvælagerðar, áður en þeim er komið í sölu - þannig að magnið sem tollgæsla haldlagði nú gæti numið allt að 2000 ambúlum í sölueiningum.

Sterar eru ávanabindandi og geta haft margvíslegar aukaverkanir, sé um langtímanotkun á stórum skömmtum að ræða. Nefna má skerta stjórn á skapsmunum, svo sem árásarhneigð, ofbeldishneigð og pirring.

Einnig lifrarskemmdir og aukna hættu á hjarta- og æðasjúkdómum, þar á meðal heilablóðfalli.