Guðmundur mun sitja hjá

Guðmundur Steingrímsson, þingmaður Bjartrar framtíðar, hefur ákveðið að hann muni sitja hjá við atkvæðagreiðslu um vantrauststillögu Þórs Saari á ríkisstjórnina. Hann staðfesti þetta í samtali við fréttastofu. Guðmundur telur að stjórnarskrármálið sé ekki dautt „Ég held að það hafi ratað í mjög mikla erfiðleika - sem voru fyrir löngu orðnir fyrirsjáanlegir - en það er ekki dautt. Nema fólk vilji," segir Guðmundur á bloggi sínu á Eyjunni.

Upphaflega stóð til að umræða um vantrauststillöguna færi fram á þriðjudag, en fulltrúar stjórnarflokkanna hafa sent Ástu Ragnheiði Jóhannesdóttur bréf og farið þess á leit að tillagan verði rædd í dag. Leita þarf afbrigða til að það gangi í gegn.