„Krabbamein er hálfviti“

Tónlistarmaðurinn Baldur Ragnarsson sló í gegn í Mottumars í fyrra, og safnaði tæpum 400 þúsund krónum sem runnu til Krabbameinsfélagsins.

Myndir Baldurs voru bæði ögrandi og erótískar, og uppátækið vakti kátínu flestra. Eða eins og Baldur orðar það sjálfur í opnu bréfi til allra Íslendinga: „Nálgun mín í fyrra var ljósmyndaþema þar sem ég birti með reglulegu millibili hæfilega alvörugefnar myndir eftir því sem áheitin hækkuðu."

Í ár verður söfnun Baldurs með breyttu sniði, og við gefum honum orðið á ný.

„Ég hef ákveðið að bjóða upp eina mynd í viku á Fésbókarsetri mínu, og hef fengið til liðs við mig ljósmyndara og listamenn sem sumir tengjast mér á einhvern hátt á meðan aðrir gera það minna. Allir eiga þessir heiðursmenn það þó sameiginlegt að hafa tekið gríðarlega vel í bón mína um að vera með."

Uppboðið í heild sinni stendur yfir í fimm vikur, en fyrsta mynd verður kynnt á mánudaginn 25. febrúar og slegin hæstbjóðanda viku síðar. Þá verður önnur myndin afhjúpuð, og þannig gengur það koll af koll þar til síðasta myndin hverfur til nýs eiganda síns þann 1. apríl.

Myndirnar eru allar af Baldri, og verða þær prentaðar ýmist á ál eða striga, og Baldur verður auðvitað með yfirskegg á þeim öllum. Listamennirnir gefa allir vinnu sína, en þeir eru Ingólfur Júlíusson, Lárus Sigurðarson, Hallmar Freyr Þorvaldsson, Jónatan Grétarsson, Ragnar Axelsson og Hugleikur Dagsson.

Baldur segist ekki ætla að láta ágóðann af uppboðinu renna saman við áheitin í sjálfum Mottumars. Þar mun hann taka þátt líkt og í fyrra, en lætur uppboðið standa fyrir utan þá söfnun.

„Og þannig er nú það. Fyrirtæki og fjársterkir aðilar koma vonandi til með að finna sig í því að styrkja málefnið með þessum hætti (og eignast þannig ómetanlegar myndir af mér) en fyrst og fremst er það ósk mín að þetta verði skemmtilegt. En við þurfum samt pening því krabbamein er hálfviti."