Fimm ára fangelsi fyrir tilraun til manndráps

Héraðsdómur Reykjaness dæmdi í dag átján ára gamlan pilt í fimm ára óskilorðsbundið fangelsi fyrir að hafa stungið fyrrverandi ástkonu föður síns margsinnis með hníf 21. apríl síðastliðinn. Konan var hætt komin eftir árásina og þurfti að grípa inn í með skurðaðgerð til þess að bani hlytist ekki af. Maðurinn játaði að hafa veist að konunni, en neitaði að hafa ætlað að ráða henni bana. Konan lá á sjúkrahúsi í þrjár vikur eftir árásina.

Pilturinn, sem býr með föður sínum í sama húsi og konan en ekki sömu íbúð, sagði fyrir dómi að hann hefði ætlað að hóta brotaþola. Hann hefði viljað að hún færi í burtu og léti föður sinn í friði. Tilgangurinn hefði aldrei verið að meiða hana, eða drepa hana.

Í skýrslutökum fyrir dómi kvaðst maðurinn ekki muna eftir að hafa stungið konuna , en sá vitnisburður stangast á við vitnisburð hans við þingfestingu málsins. Það stangast líka á við vitnisburð hans í skýrslutökum hjá lögreglu þar sem hann kvaðst muna eftir að hafa stungið hana einu sinni eða tvisvar. Í skýrslutöku fyrir héraðdómnum kvaðst pilturinn muna eftir þessari skýrslutöku hjá lögreglunni en skýrði svör sín með því að hann hefði verið spurður leiðandi spurninga, þrátt fyrir að hann hefði tekið fram að hann myndi ekkert eftir atburðunum. Þá sagðist pilturinn ekki muna eftir því að hafa veist að brotaþola með höggum og spörkum í höfuð eða veist að henni aftan frá með kyrkingartaki.

Í dómnum segir að við sönnunarmat í málinu sé játning piltsins hjá lögreglu og við þingfestingu málsins höfð til hliðsjónar, enda hafi hann ekki veitt haldbæra skýringu á fráhvarfi sínu frá umræddum framburði. Því þyki sannað að pilturinn hafi veist að brotaþola með hnífi og stungið hana ítrekað í líkamann.