Mögulegt að einstakir kaflar stjórnarskrárfrumvarpsins verði teknir út

Þingflokkar Vinstri grænna og Samfylkingarinnar funduðu í gær um stjórnarskrármálið. Engin ákvörðun var hins vegar tekin um að taka út kafla um stjórnkerfið í stjórnarskrárfrumvarpinu, en þeir kaflar hafa verið hvað mest gagnrýndir, m.a af sérfræðingum Feneyjarnefndarinnar.

Samkvæmt upplýsingum fréttastofu var rætt á fundi Samfylkingar að taka einstaka kafla frumvarpsins út.

Staðan er hins vegar flókin því ríkisstjórnin hefur ekki meirihluta á þingi. Þingmenn Hreyfingarinnar hafa lagt á það höfuðáherslu að frumvarpið í heild sinni verði klárað. Önnur umræða um frumvarpið á að halda áfram á þriðjudaginn næstkomandi.