19 leikskólabörn rekin úr strætó við Suðurlandsbraut

Deildarstjóri á leikskólanum Barónsborg vill að Strætó BS biðji starfsfólk og 19 börn leikskólans afsökunar, eftir að strætóbílstjóri rak þau út úr vagninum fyrir að vera með útrunnið strætóskírteini.

Kolbrún Harðardóttir var ásamt fjórum öðrum starfsmönnum og 19 börnum að koma úr göngutúr í Laugardal og hugðust taka strætó frá Suðurlandsbraut niður á Hlemm. Þegar börnin og starfsfólk voru komin inn í vagninn og sest kom í ljós að Kolbrún hafði í misgripum tekið með sé útrunnið strætókort barnaheimilisins.

Eftir nokkra rekistefnu samstarfskonu og bílstjórans gekk Kolbrún fram í til bílstjórans, sem þá var að reyna að ná símasambandi við skrifstofu Strætó.

„Ég segi ertu ekki að grínast? Þú ferð ekki að henda okkur hérna út úr vagninum. Hann svaraði engu nema opnaði dyrnar og við fórum út með börnin, nítján stykki."

Krakkarnir eru á aldrinum tveggja til fimm ára og augljóst að þarna voru leikskólabörn á ferð.

„Þau voru öll í gulum vestum sem æpa á mann langar leiðir, merkt Barónsborg og Reykjavíkurborg og öllu slíku."

Bílstjórinn neitaði að afhenda útrunna kortið og sagðist ekki mega það. Hann tók heldur ekki boði Kolbrúnar um að hún næði í rétt kort og kæmi með það á Hlemm til að sýna honum. Starfsfólkið og börnin tóku síðan annan vagn þar sem bílstjórinn var öllu skilningsríkari.

„Mér finnst það. Það er full ástæða til þess því ég veit að það er þjónustusamningur milli Reykjavíkurborgar og Strætó. Mér fannst allt í lagi að við værum skammaðar fyrir að vera með ónýtt kort. En að vísa okkur út úr vagninum fannst mér fáheyrt," sagði Kolbrún Harðardóttir deildarstjóri á leikskólanum Barónsborg.