Guðjón Valur: Grjóthöldum kjafti | þetta eru bara Danir

Guðjón Valur Sigurðsson, fyrirliði íslenska landsliðsins í handbolta, er sannfærður um að liðið geti lagt Dani að velli þegar liðin mætast í B-riðli heimsmeistaramótsins í Sevilla í kvöld. Danir hafa unnið alla þrjá leiki sína á mótinu og eru af mörgum taldir líklegir til þess að standa uppi sem heimsmeistarar.

Guðjón Valur er ekki í nokkrum vafa um að Ísland geti lagt stein í götu Dana í kvöld. Leikurinn hefst kl. 19.15 og er hann í beinni útsendingu á Stöð 2 sport – og einnig verður fylgst með gangi mála á Boltavakt Vísis.

„Danir eru með gríðarlega vel mannað lið – þetta er skemmtilegt lið og margir leikmenn þeirra eru einnig skemmtilegir utan vallar. Það er alltaf gaman að eiga við Dani og þetta eru alltaf hörkuleikir þegar Ísland mætir Dönum. Ég hlakka til að takast á við þá. Fyrir mér eru þetta tvö góð handboltalið sem eru að mætast á vellinum – og þetta er ekkert spurning um slag á milli litla og stóra bróður. Ég fer ekki inn á völlinn og lít á Dani sem stóra bróður í þessu samhengi, þetta eru bara Danir fyrir mér, barátta í 60 mínútur."

Geta ekki verið "pappírspésar“ inni á vellinum

Guðjón Valur er sannfærður um að Ísland eigi góða möguleika gegn Dönum – eins og sannur fyrirliði þá hefur hann mikla trú á liðinu.

„Ég leiði ekki liðið inn á völlinn gegn Dönum án þess að hafa trú á því að við getum unnið Dani – við getum unnið þá, ekki spurning."

Guðjón er ánægður með innkomu yngri leikmanna liðsins og leikmenn séu ekki að hugsa mikið um að marga lykilmenn síðari ára vanti að þessu sinni á HM.

„Það er hægt að tala endalaust um að það vanti leikmenn í hópinn og hlutirnir væru öðruvísi ef þessi eða hinn væri með okkur. Við eigum bara að grjóthalda kjafti og mæta til leiks með það lið sem er hérna og taka á því. Þetta er sú staða sem við erum í og við getum ekki breytt neinu. Ég hef rætt við yngri leikmennina og sagt við þá að ef þeir verði að gefa allt sem þeir eiga í leikina og þeir megi ekki sjá eftir neinu eftir leik eða eftir mót. Þeir geta ekki verið inni á vellinum án þess að gera eitthvað og vera hræddir við að taka ákvarðanir. Menn geta ekki verið „pappírspésar" inni á vellinum – hálfgert súkkulaði. Þeir sem koma inn á völlinn þurfa að gera það sem þeir gera rétt á þeim tíma sem þeir fá. Þetta er allt saman hluti af lærdómsferlinu og það er gaman að hafa þessa ungu strákana með," sagði Guðjón Valur Sigurðsson.