Aron: Ótrúlegt að svona geti gerst á HM

Ferðalag íslenska handboltalandsliðsins frá Sevilla til Barcelona tók mun lengri tíma en áætlað var og tók það liðið um 13 klukkustundir að komast á leiðarenda. Vegna óveðurs fóru lestarsamgöngur úr skorðum í Andalúsíu en lestarfyrirtækið Renfe er einn af styrktaraðilum heimsmeistaramótsins á Spáni.

Aron Kristjánsson þjálfari íslenska landsliðsins var allt annað en ánægður með skipulagið hjá mótshöldurum – en hann segir að leikmenn liðsins muni eflast við þetta mótlæti.

„Þetta er eiginlega ótrúlegt að þetta skuli geta gerst á heimsmeistaramóti. Og við höfðum áhyggjur af þessu skipulagi þegar við sáum að okkur var ætlað að fara í rúmlega 5 tíma lestarferð," sagði Aron.

Íslenska liðið var mætt á lestarstöðina í Sevilla um kl. 8 að íslenskum tíma í morgun. Þar var beðið í um þrjár klukkustundir þar til að ákveðið var að aka öllum farðþegunum í hópferðabifreið í tvær klukkustundir til borgarinnar Cordoba. Þar tók við rúmlega fjögurra klukkustunda ferðalag til Barcelona.

„Það er annað sem við erum enn ósáttir við er að leikmenn fengu varla neitt að borða á þessu ferðalagi – og það er óásættanlegt. Þar fyrir utan komum við það seint til Barcelona að við getum ekki æft fyrr en á leikdegi sem er ekki það sem við viljum gera," bætti Aron við.

Forsvarsmenn Handknattleikssambands Íslands höfðu óskað eftir því að sá möguleiki væri skoðaður að fresta leikjum morgundagsins fram á mánudag en það kom aldrei til greina hjá mótshöldurum.

„Við lögðum fram formlega kvörtun og létum vita af óánægju okkar. Við látum þar við sitja og einbeitum okkur að leiknum gegn Frökkum. Við munum nota þetta til þess að efla okkur enn frekar fyrir þann leik – Frakkarnir hafa fengið nudd og slökun í Barcelona eftir létta æfingu á meðan við vorum að þvælast í þessu lestarferðalagi. Við látum samt ekki þessa vitleysu eyðileggja fyrir okkur.

Fyrir leikmennina þá skiptir hvíld og endurheimt eftir leikina meira máli en æfingar. Það hefði verið mun betri kostur að hafa fengið nægan svefn, mat og æfingu í Sevilla og tekið kvöldflug heldur en þetta rugl – en svona er þetta og við verðum að vinna eins vel úr þessu og við getum," sagði Aron Kristjánsson.