Stjórnvöld í Suður-Kóreu með ítök í sérleyfi á Drekanum

Ríkisolíufélag Suður-Kóreu er komið í lykilstöðu á Drekasvæðinu, sem stærsti eigandi Faroe Petroleum. Forstjóri Faroe vonast til að koma með borpall á Drekann eftir þrjú til fjögur ár og segir félagið nægilega sterkt til að standa fyrir borunum.

Olíufélag sem stofnað var í Færeyjum fyrir fimmtán árum þykir einhverjum kannski ekki líklegt til stórræðanna á Drekasvæðinu en það er engu að síður orðinn handhafi 67 prósenta í sérleyfi til olíuvinnslu á landgrunni Íslands. Faroe er hins vegar fyrir löngu vaxið út úr Færeyjum. Það flutti til Skotlands, er með höfuðstöðvar í Aberdeen, var skráð í kauphöllinni í London fyrir áratug, og er bæði í olíuleit og vinnslu.

Forstjóri Faroe, Graham Stewart, segir félagið þegar framleiða um átta þúsund tunnur af olíu á dag. Það sé með skrifstofur í Aberdeen, London, Stavanger og Þórshöfn, sé með öflugan mannskap í olíuleit og olíuframleiðslan standi undir kostnaði við leitina. Í samtali við Stöð 2 segir Stewart félagið því orðið nokkuð sterkt og það vinni í samstarfi við mörg af stærstu olíufélögum heims. Í vaxandi mæli hafi það þó sín eigin leitarleyfi og standi sjálft fyrir borunum og geta félagsins hafi aukist með tímanum.

Þegar listi yfir stærstu eigendur Faroe er skoðaður sést að þar er félagið Dana Petroleum langstærsti hluthafinn, með 23 prósenta hlut. Dana Petroleum er margfalt stærra en Faroe og einnig með höfuðstöðvar í Aberdeen. Árið 2010 var Dana hins vegar selt í heilu lagi; kaupandinn var ríkisolíufélag Suður-Kóreu, Korea National Oil Corporation. Það er eitt af stærstu fyrirtækjum Suður-Kóreu, er með starfsemi í fimm heimsálfum og var með yfir þúsund milljarða króna tekjur árið 2011.

Til að standa við þau áform að hefja boranir eftir þrjú til fjögur ár á Drekanum og að hefja olíuvinnslu á landgrunni Ísland eftir sjö til átta ár hefur forstjóri Faroe því sterkan bakhjarl; olíurisa sem stýrt er af stjórnvöldum í Suður-Kóreu.