Telur steraneyslu vera að aukast

Á fyrstu tveimur mánuðum þessa árs lagði Tollgæslan hald á tæplega 62 þúsund steratöflur, 20 grömm af steradufti, 1900 ampúlur, sex túpur og lítra af fljótandi sterum, sem verður að nokkrum þúsundum skammta í töfluformi.

Á öllu síðasta ári lagði Tollgæslan hald á um 37 þúsund steratöflur og um lítra af fljótandi sterum. Kári Gunnlaugsson yfirtollvörður, hefur áhyggjur af aukinni steranotkun.

„Þetta er svona þrefalt magn miðað við allt árið í fyrra, tvöfalt til þrefalt magn bara á fyrstu tveimur mánuðunum. Það er svakalegt alveg."

Hann telur að hluti þessarar aukningar sé að þakka öflugu starfi Tollgæslunnar, en segist einnig hræddur um að hreinlega hafi orðið aukning í steranotkun. Í lok febrúar var síðan lagt hald á eina stærstu sendingu sem komið hefur til landsins.

„Já, það er náttúrulega inni þarna ein stór sending en auk þess höfum við merkt það að á síðustu mánuðum og seinni hluta síðasta árs að það er aukning í þessu."