Kínverskir fjárfestar vilja kaupa Íslandsbanka

Fjárfestahópur frá Asíu hefur áhuga á að kaupa 95% hlut Glitnis í Íslandsbanka. Þessu greinir Morgunblaðið frá í dag og samkvæmt heimildum er kaupverðið sagt geta numið um 115 milljörðum króna.

Talið er að ekki verði farið fram á að fjárfestunum, sem meðal annars samanstendur af kínverskum fjárfestum, verði veittur afsláttur á þeim gjaldeyri sem greitt yrði með við kaup á bankanum.

Þá herma heimildir að forsætisráðherra og efnahags- og fjármálaráðherra hafi verið upplýstir um áhuga hópsins. Slitastjórn Glitnis bíður nú viðbragða stjórnvalda við því hvort salan gæti verið hluti af mögulegum nauðasamningi þrotabúsins.