Ólafur og félagar komnir á toppinn í Meistaradeildinni

Ólafur Gústafsson og félagar hans í þýska liðinu Flensburg-Handewitt eru komnir upp í efsta sætið í sínum riðli í Meistaradeildinni í handbolta eftir átta marka heimasigur á serbneska félaginu Partizan Belgrad í kvöld, 31-23.

Flensburg er með tólf stig eins og bæði Chekhovskiye Medvedi og HSV Hamburg sem gerðu 29-29 jafntefli í hinum leik riðilsins fyrr í dag. Flensburg er með bestan árangur í innbyrðisleikjum þessara þriggja liða en Medvedi er þar með slakasta árangurinn.

Ólafur skoraði eitt mark í leiknum en það tók hann aðeins nokkrar sekúndur að skora sitt fyrsta mark þegar hann kom inn í leikinn í fyrri hálfleiknum og kom Flensburg í 12-10.

Flensburg-liðið var fjórum mörkum yfir í hálfleik, 17-13 eftir að staðan var 13-13 fimm mínútum fyrir hálfleik. Flensburg stakk síðan endanlega af í byrjun seinni hálfleiksins.

Arnór Atlason er að ná sér af hásinarmeiðslum og gat því ekki spilað með Flensburg en hann var með á bekknum og veitti þjálfaranum Ljubomir Vranjes góð ráð.

Danirnir Anders Eggert og Lasse Svan Hansen voru markahæstir hjá Flensburg, Eggert með sjö mörk en Hansen með fimm mörk.