Ísland og Júgóslavíuþjóðirnar

Íslenska landsliðinu gekk oft ágætlega í leikjum sínum á móti gömlu Júgóslavíu og náði meðal annars jafntefli á móti verðandi Ólympíumeisturum í fyrsta leik á ÓL í Los Angeles 1984. Júgóslavía var stórveldi í handboltanum sem sameinað ríki en eftir að landið skiptist upp hafa Króatar verið í sérflokki. Eftir stríðið á Balkanskaganum liðaðist Júgóslavía í sundur og varð að ríkjunum Króatíu, Serbíu, Slóveníu, Makedóníu, Svartfjallalandi og Bosníu.

Síðan þá hefur íslenska landsliðinu gengið misvel með Júgóslavíuþjóðirnar en í tilefni af leiknum á móti Makedóníu á HM á Spáni í kvöld hefur Fréttablaðið kannað gengi íslenska landsliðsins á móti þessum þjóðum í keppnisleikjum á erlendri grundu. Hér eru teknir inn leikir á stórmótum sem og útileikir í undankeppnum.

Júgóslavar urðu heimsmeistarar 1986 en eftir sundurliðun hafa aðeins Króatar leikið það eftir. Króatar urðu heimsmeistarar 2003 og fengu silfur á HM bæði 2005 og 2009. Íslenska landsliðinu hefur gengið illa með Króata í alvöru leikjum og Króatíugrýlan hefur tekið við af Svíagrýlunni.

Serbar spiluðu fyrst undir merkjum Júgóslavíu, síðan sem Serbía og Svartfjallaland og loks sem bara Serbía. Tölfræðin á móti öllum þessum útgáfum af serbneska liðinu er tekin inn í tölfræði Serbanna. Serbar náðu sínum besta árangri á HM með því að vinna brons 1999 og 2001 en íslenska liðinu hefur áfram gengið ágætlega með Serba og aðeins tapað einum af síðustu fimm leikjum.

Leikir Íslands og Slóveníu eru alltaf jafnir og spennandi en þjóðirnar hafa alltaf skipst á að vinna á stórmótum. Slóvenar unnu fyrsta leikinn á EM í Króatíu og einnig þann síðasta á EM í Serbíu í fyrra en Ísland hefur unnið þrjá af sjö leikjum sínum við Slóvena.

Ísland mætir Makedóníu í fyrsta sinn á stórmóti í kvöld en íslensku strákarnir hafa hins vegar mætt Makedóníu fjórum sinnum í umspilsleikjum fyrir stórmót. Eitt af sárustu töpum íslenska landsliðsins undanfarin ár var einmitt á móti Makedóníu í umspili fyrir HM í Króatíu 2009.

Íslenska landsliðið hefur aftur á móti unnið alla sex heimaleiki sína á móti Makedóníu í þessum umspilum og vonandi halda strákarnir áfram sigurgöngu sinni utan Balkanskagans.

Ísland hefur hvorki mætt Bosníumönnum né Svartfellingum í alvöru leikjum. Bosníumenn hafa aldrei komist á stórmót en Svartfellingar eru nú með á sínu fyrsta HM og gætu hugsanlega orðið mótherjar Íslands í sextán liða úrslitunum.

Hér fyrir ofan á síðunni má sjá kort af gömlu Júgóslavíu og gengi íslenska landsliðsins á móti þjóðunum þar í leikjum á stórmótum eða í undankeppnum á erlendri grundu.