Snorri Steinn kominn upp fyrir Sigga Sveins

Snorri Steinn Guðjónsson, leikstjórnandi íslenska handboltalandsliðsins, komst í fyrrakvöld inn á topp fimm yfir markahæstu landsliðsmenn Íslands frá upphafi. Snorri Steinn þurfti þrjú mörk til að jafna Sigurð Val Sveinsson og gerði gott betur því hann skoraði alls sex mörk í leiknum eða einu meira en hann hafði gert í fyrstu þremur leikjunum á HM.

200 mörk í fjórða sætið

Það á eftir að koma í ljós hvort Snorri Steinn komist ofar á listann en það eru heil 200 mörk í Valdimar Grímsson sem situr í 4. sætinu. Ólafur Stefánsson, Guðjón Valur Sigurðsson og Kristján Arason eru þeir einu sem hafa náð að brjóta þúsund marka múrinn.

Það var við hæfi að Snorri Steinn náði þessum tímamótum í leik á móti Dönum sem virðast alltaf kalla það fram það besta hjá þessum 31 árs gamla leikmanni. Snorri Steinn hefur skoraði 8,4 mörk að meðaltali í fimm leikjum sínum við Dani á stórmótum og alls hafa 92 marka hans fyrir landsliðið komið í 18 landsleikjum hans við Danmörku en það gerir yfir fimm mörk að meðaltali í leik.

Danir vilja eigna sér Snorra

Danirnir vilja reyndar eigna sér Snorra Stein eins og við Íslendingar gerum með Hans Lindberg, hægri hornamann Dana, en Lindberg á íslenska foreldra. Móðurafi Snorra Steins er Dani og hann hefur einnig spilað stóran hluta atvinnumannaferils síns í Danmörku. Eins og er spilar hann með danska liðinu GOG.

Það vakti athygli Íslendingar sem fylgdust með útsendingu danska stjórnvarpsins frá leik Íslands og Danmerkur að þeir fóru lofsamlegum orðum um „sinn" mann.

Snorri Steinn spilaði sinn fyrsta landsleik árið 2001 en bestu landsliðsár hans voru 2007 (121 mark í 24 leik) og 2008 (169 mörk í 31 leik) en þá skoraði hann yfir fimm mörk að meðaltali í leik.

Snorri Steinn hefur náð að brjóta 10 marka múrinn í níu landsleikjum, þar af hafa fimm þeirra verið á stórmótum. Leikurinn á móti Dönum var enn fremur 46. landsleikur hans með sex mörk eða meira.

209 mörkum meira en sá næsti

Snorri er langmarkahæstur meðal leikstjórnenda landsliðsins en hann hefur skorað 209 mörkum meira en Geir Hallsteinsson sem er í 2. sætinu. Það má búast við að sá munur aukist talsvert því Snorri Steinn á vonandi eftir nokkur góð ár með íslenska landsliðinu.