Bótasvik allt að 3,4 milljarðar

Ríkisendurskoðun áætlar að bótasvik í almannatryggingakerfinu geti numið allt að 3,4 milljörðum króna á ári. Því telur embættið að efla þurfi eftirlit, meðal annars að rýmka lagaheimildir Tryggingastofnunar til að afla og vinna með persónuupplýsingar. Eins að rýmka þurfi heimildir stofnunarinnar til að beita viðurlögum við bótasvikum því mikilvægt sé að viðurlög séu þannig að þau fæli fólk frá því að reyna að svíkja út bætur. Þetta kemur fram í skýrslu Ríkisendurskoðunar um eftirlit Tryggingastofnunar með bótagreiðslum í almannatryggingakerfinu. Fram kemur að á árunum 2011–2012 stöðvaði stofnunin óréttmætar greiðslur sem námu samtals tæplega 100 milljónum króna á ársgrundvelli. Ekki liggur fyrir mat á ætluðu umfangi bótasvika hér á landi en í Danmörku er áætlað að þau nemi á bilinu 3–5% af heildarfjárhæð bótagreiðslna. Sé miðað við þetta hlutfall má ætla að bótasvik hér nemi í heild tveimur til 3,4 milljörðum króna á ári. Talið er að hætta á svikum eða mistökum við bótagreiðslur sé einkum tengd upplýsingagjöf fólks um búsetu, hjúskaparstöðu og tekjur. Þannig eru dæmi um að foreldrar sem eru í sambúð skrái sig sem einstæða til að fá hærri greiðslur en þeir eiga rétt á, segir í tilkynningu.