Þrjú orðuð við varaformannsstól VG

Ljóst er að forysta Vinstri grænna tekur nú breytingum eftir að Steingrímur J. Sigfússon formaður flokksins tilkynnti um helgina að hann myndi ekki gefa kost á sér til áframhaldandi formennsku.

Fylgishrun flokksins hefur verið töluvert frá því í kosningunum 2009 og hefur farið úr tæpum tuttugu og tveimur prósentum niður í tæp níu prósent samkvæmt nýjustu könnun.

Katrín Jakobsdóttir nú varaformaður VG gaf í gær út þá yfirlýsingu að hún sæktist eftir formennsku í flokknum en landsfundur fer fram um næstu helgi. Sátt virðist ríkja um áform Katrínar og hefur enginn annar enn sem komið er verið orðaður við formennsku flokksins.

En þá velta menn fyrir sér hver sækist eftir varaformannsstól VG og hafa amk þrír verið nefndir; Svandís Svavarsdóttir umhverfis og auðlindaráðherra, Björn Valur Gíslason formaður fjárlaganefndar og Árni Þór Sigurðsson varaformaður þingflokksins.

Svandís lýsir því yfir í Fréttablaðinu í dag að hún sækist hvorki eftir formennsku né varaformennsku á næsta landsfundi. Árni Þór Sigurðsson vildi ekki í samtali við fréttastofu gefa afgerandi svör um hvort hann sæktist eftir varaformennsku eða ekki en segist vera að hugleiða það. Afstaða hans skýrist í dag. Björn Valur Gíslason vildi ekki heldur gefa svör um mögulegt framboð sitt en segir í Fréttablaðinu í dag hafa fengið mikla hvatningu og áskoranir varðandi varaformennsku.

Björn Valur sóttist eftir fyrsta til öðru sæti á lista í Reykjavík í forvali flokksins en endaði í því sjöunda. Alþingiskosningar verða eftir rúmlega tvo mánuði eða 27.apríl.