Um 3.000 ný störf í Reykjavík frá 2010

Skráð atvinnuleysi í Reykjavík í desember 2012 var 6 prósent og hafði lækkað um 2,1 prósent frá sama mánuði 2010. Þetta kemur fram í tölum sem Skrifstofa borgarstjóra tók saman, í samvinnu við Hagstofu Íslands, og Vinnumálastofnun, og kynntar voru í minnisblaði í borgarráði í síðustu viku.

Atvinnuleysi í Reykjavík er þó ívið hærra en á landinu öllu þar sem það er 5,7 prósent.

Þar kemur einnig fram að á árabilinu 2010 til 2012 hafa orðið til 3.000 ný störf í höfuðborginni. Flest þeirra hafa orðið til á hinum almenna vinnumarkaði, en í minnisblaðinu kemur fram að gera megi ráð fyrir því að vinnuátaksúrræði Vinnumálastofnunar hafi skilað um 570 manns störfum og þar sé hlutur Reykjavíkurborgar 250 manns.

"Það er auðvitað atvinnulífið í borginni sem hefur skilað mestu af þessum vexti en við höfum lagt okkur fram við að styðja við bakið á því," segir Dagur B. Eggertsson, formaður borgarráðs.

Hann segir ferðaþjónustuna hafa komið sterka inn á síðustu árum en einnig skapandi greinar eins og kvikmyndagerð. Jákvætt sé að mikill vöxtur sé í litlum og meðalstórum fyrirtækjum. "Svo átta sig kannski ekki allir á því en byggingariðnaðurinn er farinn aftur af stað með íbúðabyggðum í Reykjavík og framkvæmdum við hótel- og gistirými til að fylgja eftir þessari miklu fjölgun ferðamanna."

Reykjavíkurborg hefur sett fjármuni í vinnumarkaðsátök en Dagur segir að kannski séu mikilvægustu ákvarðanirnar þær sem kosta ekkert. Þar vísar hann til breytinga á skipulagi varðandi litlar og meðalstórar íbúðir.

Þegar menntunarstig er skoðað sést að mest er fækkun atvinnulausra í hópi þeirra sem eingöngu hafa grunnskólapróf, eða ríflega 1.000 manns. Hjá háskólamenntuðum fækkar atvinnulausum um 300. Þegar litið er til atvinnugreina er fækkun atvinnulausra mest í hópi þeirra sem vinna við mannvirkjagerð, rétt um 500 manns, og í verslun fækkar atvinnulausum um 350 manns.

Eins og sést á grafinu hér fyrir ofan er atvinnuleysi mest í póstnúmeri 111, eða Breiðholti.