40 þúsund ferðamenn væntanlegir á Ísafjörð

Allt stefnir í að 40 þúsund ferðamenn komi til Ísafjarðar með skemmtiferðaskipum í sumar, en það er fjölgun um tíu þúsund manns frá síðasta sumri. Frá þessu segir á vef Bæjarins Besta. Nú hafa 38 skip boðað komu sína í sumar, en það er fjölgun um sjö skip frá síðasta sumri. Tekjur Ísafjarðarhafnar af skipunum í fyrra námu um 32 milljónum króna, en skipin kaupa bæði rafmagn og vatn, auk ýmissar þjónustu, á meðan á dvölinni stendur. Þá eru ótaldar tekjur verslana og veitingastaða af ferðamönnunum.