Fjöruverðlaunin afhent á sunnudag

Vigdís Finnbogadóttir, fyrrverandi forseti Íslands, mun afhenda Fjöruverðlaunin 2013 á konudaginn, næstkomandi sunnudag, klukkan ellefu. Vigdís mun jafnframt halda stutta ræðu og segja frá félagsskap kvenkyns þjóðarleiðtoga. Þá verða pallborðsumræður um stöðu kvenna í listum. Konur úr ólíkum listgreinum munu taka þátt í þeim.

Fjöruverðlaunin voru upphaflega hluti af Góugleði – bókmenntahátíð kvenna – sem var haldin í fyrsta sinn vorið 2007, að frumkvæði hóps kvenna innan Rithöfundasambands Íslands og Hagþenkis.

Fjöruverðlaunin hafa verið veitt árlega frá árinu 2007. Þau verða því veitt núna í sjöunda skiptið.

Eftirfarandi bækur og höfundar eru tilnefndar til Fjöruverðlaunanna að þessu sinni:

Barna- og unglingabækur:

Randalín og Mundi eftir Þórdísi Gísladóttur. Útgefandi: Bjartur.

Mitt eigið Harmagedón eftir Önnu Heiðu Pálsdóttur. Útgefandi: Salka.

Grímsævintýri eftir Kristínu Helgu Gunnarsdóttur. Útgefandi: Mál og menning.

Fræðibækur:

Reykholt: Archaeological Investigations at a high status farm in Western Iceland eftir Guðrúnu Sveinbjarnardóttur. Útgefandi: Þjóðminjasafn Íslands og Snorrastofa.

Við góða heilsu? Konur og nútímaheilbrigði í nútímasamfélagi í ritstjórn Helgu Gottfreðsdóttur og Herdísar Sveinsdóttur. Útgefandi: Háskólaútgáfan.

Sagan af Klaustrinu á Skriðu eftir Steinunni Kristjánsdóttur. Útgefandi: Sögufélagið.

Fagurbókmenntir:

Ósjálfrátt eftir Auði Jónsdóttur. Útgefandi: Mál og menning.

Ljósmóðirin eftir Eyrúnu Ingadóttur. Útgefandi: Veröld.

Hvítfeld – Fjölskyldusaga eftir Kristínu Eiríksdóttur. Útgefandi: JPV.