Hoppuðu á bíla og brutu rúðu

Lögreglunni á Suðurnesjum barst aðfaranótt sunnudags tilkynning um tvo menn sem voru að gera að leik sínum að hoppa á bíla fyrir utan skemmtistað í umdæminu. Fór svo að annar piltanna, sem eru um og yfir tvítugt, braut framrúðu bifreiðar í látunum.

Lögreglan ræddi við mennina og tjáði þeim er rúðuna braut að hann þyrfti að gjalda fyrir gjörðir sínar. Ennfremur var piltunum bent á að eyða orku sinni í eitthvað annað og nytsamlegra í framtíðinni. Þá barst lögreglu tilkynning um að gengið hefði verið ofan á bifreið og fundust skóför á þaki bílsins.

Ökumaður, sem sinnti börnum í aftursætinu við akstur, endaði aksturinn á umferðareyju. Engin slys urðu þó á fólki. Annar ökumaður ók bifreið sinni á ljósastaur þegar bifreiðin lenti í möl í vegkantinum.

Bifreiðin hafnaði í kjölfarið utan vegar og öryggispúðar í henni sprungu. Ökumaðurinn var fluttur á Heilbrigðisstofnun Suðurnesja til skoðunar.