Óvenjulegt hljóðfæri tilnefnt til verðlauna

Rafstrokin harpa tónlistarmannsins Úlfs Hanssonar er meðal þeirra verkefna sem tilnefnd eru til Nýsköpunarverðlauna forseta Íslands.

Hljóðfærið er 26 strengja, með snertitökkum, en að auki sjálfspilandi með hjálp tölvu.

Úlfur, sem er 24 ára, lauk námi á nýmiðlabraut tónsmíða við Listaháskóla Íslands síðasta vor, en þessi ungi tónlistarmaður hefur verið iðinn við kolann í allnokkur ár.

Harpa Úlfs er sögð eiga erindi inn í heim raftónlistarinnar, en "býr engu að síður yfir akústískum eiginleikum hefðbundinna eldri hljóðfæra".

Frumgerðin var tilbúin í fyrrasumar og þá var strax hafist handa við að smíða nýja gerð rafkerfis fyrir endurbætta útgáfu af hörpunni. Þróun og hönnun nýja rafkerfisins var gerð möguleg fyrir tilstilli styrks úr Nýsköpunarsjóði Námsmanna Rannís.

Frágangur nýja rafkerfisins er nógu fullkominn til að láta fjöldaframleiða og koma fyrir í fleiri handsmíðuðum hörpum. Framhald verkefnisins nú miðar að framleiðslu rafkerfis, þróun útlits og hönnun hörpunnar að því marki að hún verði hæf til sölu og markaðssetningar.

Úlfur gefur út plötuna White Mountain þann 5. mars næstkomandi undir merkjum bandaríska útgáfufyrirtækisins Western Vinyl, en heyra má í rafstroknu hörpunni hér.

Hér má svo sjá upplýsingar um öll verkefnin sem tilnefnd eru til Nýsköpunarverðlauna forseta Íslands.