Yfir 600 mál höfðuð gegn ríkinu frá árinu 2008

Frá árinu 2008 hafa verið höfðuð 614 mál á hendur ríkinu. Ef eingöngu er horft á málshöfðanir fyrir héraðsdómi þá eru þær 455 og 26 fyrir Félagsdómi.

Þetta kemur fram í svari forsætisráðherra við fyrirspurn frá Lilju Mósesdóttur á Alþingi. Í svarinu kemur m.a. fram að öll málin að frátöldum 24 á þessu tímabili hafa verið flutt af ríkislögmanni eða lögmönnum sem starfa við embættið.

Allmörg þjóðlendumál hafa verið rekin af öðrum lögmönnum með heimild ríkislögmanns og fjármála- og efnahagsráðuneytis. Eru þau um 50 talsins frá 2008.