Þóknanir allra slitastjórna gætu verið opinberaðar

Ef krafa fimm lífeyrissjóða um að Héraðsdómur Reykjavíkur láti slitastjórn Glitnis skila meintum ofgreiddum þóknunum í þrotabúið verður tekin til efnislegrar meðferðar er óhjákvæmilegt að dómurinn afli sér allra upplýsinga um þóknanir annarra slitastjórna líka.

Þetta er mat slitastjórnar Glitnis sem sett er fram í svarbréfi hennar vegna kröfu lífeyrissjóðanna. Fréttablaðið hefur bréfið, sem var sent á þriðjudag, undir höndum.

Lífeyrissjóðirnir fimm; Lífeyrissjóður verzlunarmanna, Gildi lífeyrissjóður, Sameinaði lífeyrissjóðurinn, Söfnunarsjóður lífeyrisréttinda og Festa lífeyrissjóður, vilja meina að Steinunn Guðbjartsdóttir, Páll Eiríksson og fyrirtæki þeirra hafi oftekið sér um 400 milljónir króna í þóknanir fyrir störf við þrotabúið. Alls höfðu þau fengið 842 milljónir króna greiddar um mitt síðasta ár.

Fréttablaðið greindi frá því í síðustu viku að engir kröfuhafar Kaupþings og LBI (gamla Landsbankans) hefðu farið fram á sundurliðaðan kostnað vegna þóknana þeirra. Slitastjórnir þeirra beggja hafa ekki viljað opinbera slíka sundurliðun.

Af upplýsingum sem hægt er að finna á heimasíðu LBI má þó reikna út að heildarkostnaður við slitastjórn og skilanefnd bankans hafi verið 1,7 milljarðar króna fram á mitt síðasta ár. Það er helmingi meiri kostnaður en slitastjórn Glitnis hefur greitt sér. Slitastjórn Kaupþings hefur hvorki viljað afhenda upplýsingar um þær þóknanir sem greiddar hafa verið til slitastjórnar og skilanefndar bankans né launakostnað Kaupþings.

Í bréfi slitastjórnar Glitnis til héraðsdóms segir að „telji héraðsdómur að erindið sé tækt til efnismeðferðar er óhjákvæmilegt að héraðsdómur leiti upplýsinga um kostnað og tímagjald sambærilegra sérfræðinga eigi þessi samanburður um þóknun og tímagjald að fara fram enda byggir krafa lífeyrissjóðanna á því að tímagjald Glitnis sé óhóflegt og standist ekki samanburð við sambærileg störf sérfræðinga hjá öðrum sambærilegum slitastjórnum“.